La boç de Miranda

You nun sou you.

Chamo-me Manuel mas nun sou Manuel:

Nun me chamo Marie, mas sou tamien Marie,

Purírun-me un nome, mas sou todos ls nomes

De ls homes i de las mulhieres

De la squina de l Nordeste.

Sou la boç de la tierra an que naci i me criei!

Toda la tristeza

De la giente mirandesa

Ye mar que m’antrou n’alma

I me roubou la calma

Sien modo nien lei!

Mar que fizo de mi un campo de batalha,

I anda cumigo a las buoltas

Por caminos i atalhos que nien sei!

- Gritos que crécen,

I de tanto gritar çfalhécen,

Óndias que ban, óndias que bénen! –

A que me cumpararei?

Sou la boç de Miranda

(Cumo un probezico, roto muorto, sfameado,

Que pide un cacho de pan, un palheiro, ua croua)

A gritar para Lisboua:

“A que dal rei! A que dal Rei!”

Manuel Preto
Bersos Mirandeses, eidiçon de Cámara de Miranda, 1993